السفر الى الامارات من مصر للعمل

 السفر الى الامارات من مصر للعمل , السفر الى الامارات للبحث عن عمل , السفر الى الامارات للعمل , الاوراق المطلوبه للسفر الى الامارات من مصر , السفر الى الامارات ,

السفر الى الامارات من مصر للعمل

المقال دة شامل للبحث عن عمل والاقامه والشغل في دبي

لو انت تايه ومش عارف تروح الامارات ولا متروحش ..ومش عارف تعمل ايه عشان
متخسرش فلوسك .. اقرأ المقال دة للاخر

السفر الى الامارات من مصر للعمل

------------------------------------------------------
عشان تشتغل في الامارات بيحصل حاجه من اتنين :
1- بيجيلك عروض وانت قاعد في بلدك معزز مكرم وتسافر علي شغل
2- تروح بفيزا سياحه شهر او 3 شهور وتدور انت بنفسك

اولا : نتكلم علي الناس اللي بيجيلها عروض من الامارات  وهي في مصر :

مبدأيا نجاوب علي السؤال الذي حير الملايين
انا دكتور وجايلي عرض شغل في دبي بمرتب كذا اوافق ولا موافقش ؟ 
انا مهندس وجايلي عرض شغل في دبي بمرتب كذا اوافق ولا موافقش ؟
لما حد يجيله عقد عمل او عرض عمل ومحتار يقبل ولا لأ 
لازم يفكر في 3 حاجات :
1- وضعك في مصر 
2- متوسط تكاليف المعيشة في المنطقه اللي هتروحها في دبي 
3- هدفك او طموحك من السفر
رقم 1 : وضعك في مصر
لو انت اعزب وبتاخد 3000 او 4000 جنيه في مصر 
او انت متزوج و بتاخد 6000 او 7000 جنيه في مصر
يعني حياتك في مصر شبه مستقره .. ( مقولتش مستقره بشكل كامل بقول شبه مستقره ) مستورة يعني
ساعتها لما تحب تطلع برا يبقي تطلع علي حاجه مضمونه وافضل وظيفيا واجتماعيا من وضعك بتاع مصر 
مينفعش مثلا تسيب المرتب دة عشان تروح تاخد 1000 درهم بس مثلا في دبي !! 
لكن لو انت بتاخد يادوب 500 جنيه في الشهر وقتها اي مرتب بأي وضع برا مصر هيكون احسن من وضعك اللي في مصر وتقبل بأي عرض يجيلك فورا ..
رقم 2 : متوسط تكاليف المعيشه في المنطقه اللي هتروحها في دبي
لازم مرتبك اللي هتاخدة في الدوله اللي رايحها يكون علي الاقل مغطي الحد الادني لمتوسط تكاليف المعيشه 
يعني مثلا مينفعش تقول عايز اعيش في المركز المالي او دبي مارينا او البارشا في دبي ومرتبك 500 درهم بس ..
هتعيش ازاي بالراتب دة ومتوسط تكاليف المعيشه في دبي عالي جدا جدا جدا مهو اكيد مش هيكفوك مهما عملت 
لازم تعرف الحد الادني من متوسط تكاليف المعيشه هناك ودة بتعرفه من
موقعhttps://www.numbeo.com/cost-of-living/ وعلي اساس الحد الادني دة هتعرف تعمل تقييم للراتب المعروض عليك وهل هيكفيك ولا لأ
والموقع بيعرفك كل حاجه من اول الاكل والشرب والمواصلات وكل حاجه
رقم 3 : طموحك وهدفك من السفر
لو طموحك هو التحويش وانك تحط القرش علي القرش عشان تهاجر بلد افضل بعد كام سنه وقتها لازم تروح علي مرتب تعرف تحوش منه .. يعني بالبلدي لازم يدفعوا ليك ثمن غربتك اللي هتتغربها
لكن لو طموحك هو انك واخد السفر دة مرحله مبدئيه بس عشان تخرج من مصر وبعد كدة ربنا يفتحها عليك وتترقي يبقي ساعتها هتقدم تنازلات عادي ومش شرط تاخد بدل سكن وبدل مواصلات واوفر تايم .. هتقدم تنازلات عشان تعرف تسافر وتاخد خطوة مبدئيه
دة الملخص باختصار .. احسب حسبتك بناءا علي ال 3 عوامل دول وحدد قرارك بنفسك بدون الاستعانه بأي حد وطبعا استخير في الاول والاخر
بالمناسبه ابقي شوف العرض اللي معروض عليك عليهم تذكره الطيران والفيزا ولا لأ .. لان في اوقات كتير شركات بتدفعلك تذكره الطيران كمان
---------------------------------------------------------------

ثانيا : الطريقه التانيه انك تروح بفيزا سياحه شهر او 3 شهور للامارات وتدور انت براحتك 

مبدأيا عشان تلاقي شغل بالطريقه دي لازم يكون عندك حاجتين :
1- انجلش اللغه مهمه جدا جدا جدا فوق ما تتصور
2- يكون معاك 50 الف جنيه فأكثر ( شاكب راكب ) عشان تعرف تعمل الرحله دي ...
ممعكش الحاجتين دول يبقي عدي المقال ولا كأنك شوفته ومتفكرش فى دبي اصلا
متصدقش الناس اللي هتنصب عليك وتقولك روح دور علي شغل حتي لو ممعاكش غير حق تذكرة الذهاب بس الكلام دة ملوش اى اساس من الصحه ...
معاك انجلش كويس و معاك 50 او 60 الف جنيه عشان تعمل السفرية دي و تروح تدور علي شغل تمام روح وربنا يرزقك .. لكن لو ممعكش المبلغ دة ولا اللغه دي متروحش ولا تفكر اساسا في الامارات
--------------------------------------------------------------
طيب انا معايا المبلغ دة ومعايا انجلش وكله تمام اطلع الفيزا ازاي واسافر ؟؟
1- تطلع الفيزا من اي شركه سياحه في وسط البلد و بتاخدها بعد كام يوم
وخلي بالك الرينج بتاعها من 90 دولار ل 150 دولار ممكن تكون اغلى شويه كمان علي حسب المدة بتاعتها
2- تطلع الفيزا مع الطيران الاماراتي سواء فلاي دبي او العربيه او الاتحاد او الاماراتيه
* بس شرط تحجز معاهم ذهاب وعودة
لما بتوصل بالسلامه لازم تشتري شريحه موبايل عشان يبقي معاك رقم اماراتي تكتبه في ال CV (كتابة السيرة الذاتية جاهزة) بتاعك وهتلاقي اتصالات هناك مغرقه الدنيا
* حمل تطبيق " وجهتي " من اي مكان فيه free wifi عشان تعرف تروح الاماكن
ازاي بأرخص الطرق ومن غير ما تتوه او تدفع فلوس كتير
طيب اديني وصلت و اتغديت واستريحت اعمل ايه بقي عشان ادور علي شغل ؟؟
اولا انسب وقت عشان تدور علي شغل هناك من اكتوبر ل ابريل ..
ليه مينفعش تدور علي شغل في الصيف هناك ؟؟
حضرتك الصيف هناك زي جهنم بالظبط .. الناس اصلا في الصيف بتخش المولات بدل ما تسيح في الحر وانت راجل جاي تدور علي شغل يعني هتلف علي رجلك وهتروح وتيجي وتنزل وتطلع فروح فالشتاء والخريف احسن بكتير

ثانيا : لازم تكون جاي وانت معاك حاجتين ال CV بتاعك و شهادتك متوثقه :

1- ال CV بتاعك لازم يكون اكثر من ورقه .. السي في الورقه الواحدة دة مينفعش  في الخليج لانهم عموما بيحبوا الشكليات دى ولازم تملي عينهم بال CV بتاعك 
2- شهادتك الجامعيه دي بتوثقها من امين الجامعه ومكتب توثيق الخارجيه والملحق الثقافي لسفاره الامارات أو وزاره الخارجيه الاماراتيه لما توصل

ثالثا : في 3 طرق عشان تلاقي شغل وانت في الامارات :

1- طريقه تقليديه : انك تطبع ال CV(كتابة السيرة الذاتية جاهزة) بتاعك وتنزل تلف علي رجلك وتسلمه يدا بيد للشركات والمؤسسات المعروفه في تخصصك

2- طريقه شبه تقليديه : انك بتروح تحضر مؤتمرات مجانيه عن التوظيف والشغل من وانت هناك في الامارات اللي بيسموها open day بيعملوها الشركات الكبيرة وغالبا بتبقي مجانيه

3- طريقه حديثه : انك تراسل الشركات والمؤسسات علي الميل من خلال مواقع التوظيف وتبعتلهم ايميلات بالسي في بتاعك
وممكن تدور فى المواقع والصفحات اللي بتعرض شغل في الامارات ودول كتير :
الموقع اللي جاي ده هتلاقي فيه فرص عمل وكمان مشهور جدا انك تلاقي فيه مكان تسكن فيه بالمواصفات والسعر اللي انت عايزه 
https://dubai.dubizzle.com/
----------------------------------------------------------
قبل ما اقولك انواع الاقامات وتعمل ايه عشان تاخد اقامه هناك لازم تاخد بالك من حاجتين :

الحاجه الاولي : الشغلانه بتاعتك دي سوقها عامل ازاي في الامارات .. بمعني .. معدل الرواتب بتاعها قد ايه في الامارات .. ليه لازم تعرف ؟؟

عشان اصحاب العمل هناك ميضحكوش عليك. يكون مثلا معدل الرواتب بتاع الشغلانه الفلانيه اللي هتشتغلها 10 الاف درهم مثلا وصاحب العمل يقولك هتاخد 5000 درهم بس .. كدة هيكون بيستغلك.. فلازم تعرف الشغلانه سوقها عامل ازاي قبل ما تتعاقد..
الحاجه التانيه : تاخد بالك كويس من شروط ال offer letter ودي اكثر حاجه الناس بتتخدع فيها بانها بتمضي علي العقد من غير ما تقرأ شروطه كويس 
---------------------------------------------------------------------------
الكلام اللي جاي ده وضحه المستشار القانونى : محمد الجمل يعني كلام قانوني 100 %

اولا : الشركات بتعمل حاجه اسمها فتره التجربه ( عامل تحت التجربه )
بتبقي 6 شهور وبتكون موجودة في العقد ان من حق الشركه تمشيك من غير ما تدفعلك اي مستحقات و بدون اسباب ..

قانونا قانونا قانونا وعلي الورق .. طول ما انت في فتره التجربه ملكش اي حق انك تسيب الشغل وتمشي لكن صاحب العمل بس هو اللي ليه الحق انه يمشيك بدون اي خساره عليه

لكن لو تقدر تخلي الشركه يضيفوا بند انك انت كمان من حقك انك تمشي في اي وقت في اثناء فتره الاختبار دي عشان لو جالك شركه احسن او معجبكش الشغل معاهم يكون احسن ..

ثانيا : العقود في الامارات نوعين :
1- عقد Limited : بيكون عقد سنتين او تلاته او اربع سنين كحد اقصي وبيتم تجديده بعد كدة ..

مميزاته :
* لو صاحب العمل حب يمشيك قبل انتهاء التعاقد و بعد فتره التجربه هيدفعلك مرتب 3 شهور كاملين وبيسموها في القانون تعويض عن الفصل التعسفي
عيوبه :
* لو انت اللي حبيت تمشي قبل انتهاء التعاقد وبعد فتره التجربه لازم تدفعلهم نص مرتب 3 شهور
* العقد بيكون فترته مقفوله يعني لو المدة خلصت ومش عايزين يجددولك مش هيجددولك 

2- عقد Unlimited : بيكون مفتوح يعني ملوش مدة محدده ..
مميزاته :
* ممكن تستقيل في اي وقت لو حبيت تسيبهم وتروح علي شركه تانيه لكن لازم تدي اسباب قانونيه ولازم تخطر صاحب العمل كتابيا قبل ما تمشي بمدة اخطار 30 يوم كاملا .. يعني قبل ما تمشي من الشغل بشهر كامل لازم تقولهم وتقعد الشهر كامل دة عندهم وبعدين تمشي .. 
عيوبه : 
* لو صاحب العمل حب يمشيك قبل انتهاء المدة هيدفعلك مرتب شهر واحد
لازم تكون متفق معاهم في العقد علي البدلات والاوفر تايم .. المفروض ان عدد ساعات العمل في الامارات 48 ساعه في الاسبوع .. اكثر من كدة لازم تاخد اوفر تايم ..
والاوفر تايم بيكون 20 % علي سعر الساعه العاديه ف ايام الشغل العاديه او 50 % في ايام الاجازات
كمان لازم تتفق معاهم علي الاجازات .. الاجازة غالبا اما 22 يوم عمل او 30 يوم في المطلق .. وشركات كتير بتدفعلك تذكره الطيران بتاعه الاجازة كل سنه 
-------------------------------------------------------------------
نيجى لسؤال تانى مهم ..رابعا: اسكن فين في الامارات ؟؟ 
القصيص النهده و الكرامة اسعارهم معقولة
المركز المالى غالى لانه منطقة ارقى و فى الشيخ زايد و قريبة من نص البلد كذلك البرشا مش رخيصة ...
بس الغالبية بتسكن فى الشارقة على الحدود مع دبى عشان ارخص من دبى و ناس كتير بتسكن فى المدينة العالمية و دى بعيد شوية 
السكن فى دبى مشترك ماحدش يقدر يسكن لوحده الا لو فعلا بيقبض كويس الغرفة ممكن يسكن فيها اتنين او تلاتة او عشرة و كل ما يزيد العدد يقل السعر 

ممكن تاخد غرفة فى شقة فى الشارقة ب 2000 درهم مثلا و 2500 لو بحمام خاص
الدفع بشيكات مقدمة 12 او 4 او 2 شيكات 
و كل ما يزيد عدد الشيكات يزيد السعر 
ده غير شامل الخدمات زى المياة و الكهربا و الغاز و النت
ايه موضوع الشيكات دة؟
نقولك احنا ..الرواتب بتنزل فى حسابك فى البنك ... مافيش قبض مانوال .. يا بتروح تفتح حساب او شركتك بتفتح لك ... و حساب المرتب بيكون جارى ... بيطلع معاه دفتر شيكات مجانى ...
بتروح تاجر شقة مثلا و بتكتب العقد و بيكون منصوص فيه ان الايجار بيدفع شهرى او ربع سنوى او نصف سنوى مثلا
لو شهرى يبقى بتكتب ١٢ شيك كل واحد بتاريخ استحقاق اول كل شهر من شهور السنة ... يوم ٥ مثلا تكون الرواتب نزلت
لو ربع سنوى هتكتب اربع شيكات بتواريخ مارس و يونيو و سبتمبر و ديسمبر
لو نصف سنوى يبقى يناير و يوليو مثلا ... او حسب تاريخ توقيع العقد
الشيكات دى بتتسلم مع العقد و كل ما تزيد الشيكات كل ما يزيد السعر
فى ناس كمان بتاجر بالسرير و تلاقى اتنين ماجرين سرير واحد عشان يوفروا واحد مثلا شغال شيفت الصبح و واحد بالليل ... 
عشان كده متستغربش لما تسمع ان الفلبينيين و الهنود بيرضوا بمرتبات ١٥٠٠ درهم واقل كمان 
---------------------------------------------------------
في انواع اقامات كتير في دبي منها اقامه شركه واقامه خدم وكذا نوع تاني
بس لازم اوضح نقطه بيتنصب علي المصريين بيها .... اقامة شركة مكلفة جدا ...
و اللى بيعمل الموضوع ده بيبيع فيز حرة و تمنها بيوصل لعشرين الف درهم و اكتر و مدتها سنتين و مالهاش لازمة لانك مابتشتغلش بيها قانونى ..ولو لقيت شغل لازم يعمل لك نقل كفالة على الشركة الجديدة ..
بالتوفيق للجميع